Gríslingapest

Hér geysar svínainflúensan og smithræðslan er að drepa fólk, eins og sjá má á meðfylgjandi mynd...

Allt sem kemur konum til...

Búðin Fleggard sem liggur rétt handan við þýsku landamærin er nú komin með auglýsingarherferð sérmiðaða á konur - sem innihaldi allt sem komi konum til...

Dæmiði sjálfar dömur ;o)

Ég vil heldur sofa ein takk!

Hmmm... ég hef víst vanrækt bloggið síðustu vikur. Það er svosem ekkert sérstakt að frétta af mér - eyddi síðustu helgi á málningarnámskeiði en var ekkert voðalega ánægð með kennarann (sem hafði gríðarlegt sjálfsálit en enga kennsluhæfileika). En það var svosem voða huggulegt að dunda sér með penslana heila helgi. Halloween nóttina var ég rétt að sofna þegar mér varð á að opna augun aðeins og tók eftir dökkum bletti á vegnum rétt fyrir framan nefið á mér sem ég var nokkuð vis um að ekki hafði verið þar áður. Mín útúr rúminu og kveikir á lampa og þarna situr könguló á stærði við íslenskan 100 kall. Hún var send út sjóleiðis með það sama en ég verð að segja að það var erfitt að sofna á eftir...
Reikna svosem með að það geti orðið erfitt að sofna í kvöld líka því ég ætla að horfa á hryllingsmyndina The Mist sem á að vera nokkuð svo sjaldgæft sem góð kvikmynd gerð eftir Stephen King bók. Vildi óska að ég hefði munað eftir að kaupa jólabjór, en ég á enn við sama gamla áfengisvandamálið að stríða (gleymi að kaupa áfengi). *andvarp*

Hláturskast dagsins

Þetta fékk kaffið til að frussast út um nefið á mér áðan :o)

See more funny videos and funny pictures at CollegeHumor.

Haustmyndir

Druslaðist út með myndarvélina í gær - sem gerði að sjálfsögðu að verkum að það dró fyrir sólina með það sama og hún lét varla kræla á sér fyrr en ég var komin inn aftur. En ég tók nú samt 2 myndir og bætti svo 2 við af svölunum þegar ég var kominn heim (sólin sá ekki við því sko!). Deili hér með ykkur haustinu í Herlev - og nágrönnum mínum hér í Kúmengarðinum. Klikkið á myndirnar til að sjá fulla stærð.

Úti í skógi.

Eitt af litlu vötnunum í nágreninu.

Nágrannarnir eru voða busy þessa dagana :o)

Ok - ég er áhrifagjörn...

En ég stóðst ekki mátið að breyta blogginu - búin að vera að gæla við það lengi og gat ekki lengur haldið það út þegar ég sá að Dóa var búin að breyta sínu ;o)
Nennti nú samt ekki að eyða mikilli orku í það í þetta skiptið - langaði að fá meiri liti inn og það tókst allavega! Hins vegar held ég að ég hafi nú oft verið smekklegri... Ég varð uppiskroppa með þolinmæði áður en ég var orðin sátt - kannski ég lagi það seinna. Annars eru helstu fréttir þær að Lappi minn er endanlega dauður 6ára að aldri (er það ekki alveg 150 í tölvuárum?) og ég syrgi hann þrátt fyrir að hann hafi verið orðin óttalegt skar undir lokin. Ég hef aldrei verið fullkomlega sátt við vinnutölvuna - veit ekki hversu mikið það er sjálfri tölvunni að kenna og hversu mikið það er tölvudeild DBC að kenna. Það tekur korter að starta tölvunni upp og svo má maður ekki neitt... Svo ég held ég verði að bjarga geðheilsunni með að kaupa mér nýjan Lappa. Ligg núna yfir vefsíðunum og engist yfir því hvort ég eigi að kaupa litla krúttlega Notebook eða alvöru fartölvu með stóran skerm og hvort ég eigi að láta mig hafa Windows eða hvort ég eigi að kasta mér útí djúpu laugina og fá mér Linux-Lappa!
Decisions, decisions - ég enda örugglega bara með að labba inn í tölvubúð og kaupa mér aðra HP pavillion. Nýja útgáfu af gamla góða Lappa mínum og vona svo að ég verði jafn hamingjusöm með nýja viðhaldinu og ég var með því gamla...

Verði ljós...

Er í kasti eftir að ég uppgötvaði að það er Next búð í Fields-verslunarsamtstæðunni ógurlegu. Ekki það að ég hef ekki komið í Fields í næstum ár (liggur yst úti á Amager sem gæti næstum alveg eins verið í Póllandi), og það getur vel verið að þetta sé álíka misheppnað og íslenska útibúið frá H&M, en ég læt mig dreyma!
Eitt af því sem ég læt mig dreyma um er að maður geti keypt (eða pantað inn) ljósakrónur frá Next því ég er ekki að fíla það sem IKEA og allar hinar stóru íbúðarkeðjurnar hér eru að bjóða uppá. Og mig vantar loftljós...
Mér til mikillar kátínu kom í ljós í dag þegar ég sýndi dönsku vinkonum mínum ljósin sem ég var að slefa yfir að þeim fannst ég kannski fulldjörf...

Svo ég ákvað að leggja 2 af uppáhöldudum mínum fyrir dómstól og þið megið kjósa hér við hliðina.

Valkostur A er Luna og það er efri krónan með 5 ljósum sem ég er að spá í.
Valkostur B er Kosmos sem ég er voða skotin í en stelpunum fannst full "speisað"

Best gleymt og grafið?

Best að taka það fram að þessi póstur er ekkert skemmtilegur nema þú sért Spooks-aðdáandi og þá helst ein af þeim sem hefur gleymt að anda yfir Adam. You have been warned!
Anyhoo þið hinar Adam-grúppíurnar (þið vitið hverjar þið eruð) - this is for you!
Þar sem danska sjónvarpið er með eindæmum leiðinlegt þessa dagana lagðist ég í að skoða amerískar sjónvarpssíður til að athuga hvort það væri kannski von á einhverjum áhugaverðum nýjum seríum þaðan á næstu mánuðum. Datt m.a. niður í (ekkert sérlega jákvæða) umfjöllun um seríuna "The Forgotten" sem "skartar" gamla 80's jálknum Christian Slater. Það sem fékk mig til að staldra við var að þarna stóð að Rupert Penry-Jones hefði upphaflega átt að leika hlutverk Slaters og hefði meira að segja leikið í "Pilot" þætti fyrir seríuna. Mín á YouTube og hér er afraksturinn:



Æi þessi elska er ekki alveg að gera sig með Amerískan hreim... ;o)
Og þessi Pilot er bara skelfilegur - ég held að hann hafi bara mátt kalla sig heppinn að vera ekki hluti af þessu! Ég krossa fingur og vona að BBC hafi vit á að koma honum í góða seríu hið snarasta.

Ég er ekki að standa mig ...

... í manni vikunnar - sorrý! Var að fatta að ég hef algjörlega vanrækt þann þátt bloggsins (og það er jú það sem þið komið til að sjá - viðurkennið það bara!)
Eftir nokkra umhugsun varð fyrir valinu leikari sem mér hefur reyndar aldrei fundist sætur - fyrr en hann fékk mig til að skellihlægja sem vond vampíra! Drengurinn var að fíla sig svo í hlutverkinu að ég gat ekki annað en haldið með honum...
Sem var örugglega ekki meiningin!
Annars sorglega lítið að frétta - minnisstæðasti atburður vikunnar var þegar klósettið mitt breyttist skyndilega í gosbrunn (sem betur fer var lokið á og náði lítið að slettast út fyrir). Við nánari athugun reyndust vera klóakmenn fyrir utan gluggann að vesenast eitthvað í lögnunum. Og þeir voru þarna að dunda sér í fleiri klukkutíma - sem hefði verið í lagi ef ég hefði ekki þurft að pissa...
Á endanum varð ég hreinlega að láta undan blöðrunni, en verð nú að viðurkenna að ég var hálf hrædd um að: a) það kæmi annar gosbrunnur á meðan eða b)ég myndi heyra skaðræðisöskur neðan úr lögnunum þegar einhver óheppinn klóakmaðurinn fengi sendingu í hausinn...

Svona er lífið spennandi í Kúmengarðinum þessa dagana.

Dr. Horrible tekur völdin á Emmy hátíðinni

Óheillakráka

Ég er bara ekki heppin þessa dagana. Ef ég væri ekki trúlaus myndi ég gruna guðina um að hafa tekið sig saman um að hrella mig. Ekki það að ég er svosem ekki ein um þetta þessa dagana, það er búið að ganga ýmislegt á í vinnunni og það er ekki (allt) mér að kenna! Tökum mánudaginn sem dæmi: við máttum öll bíða drjúga stund eftir að tölvurnar okkar ræstu sig um morguninn, og það varð fljótlega ljóst að eitthvað hafði farið úrskeiðis yfir helgina því öll kerfi gengu í hægagangi. Ég gat lifað með því. Svo kom í ljós að bærinn hafði náð að grafa sundur vatnslögnina í götunni svo við fengum skilaboð frá húsverðinum um að hugsa okkur vel um áður en við færum á klósettið því það væri ekki hægt að sturta niður! Óskemmtilegt, en ég gat lifað með því. En þegar ég komst að því að vatnskorturinn olli því að það var ekki hægt að fá kaffi í húsinu pakkaði ég saman og vann heima restina af deginum.
Það eru takmörk fyrir því hvað maður getur höndlað á mánudegi!
Annars lítið að frétta, klikkað að gera í vinnunni og búið að vera hið fallegasta haustveður síðan ég keypti regnkápuna... Helgarplanið er: stórhreingerning (og veitir ekki af) og að njóta veðurblíðunnar því veðurfræðingarnir segja að þetta séu síðustu góðu dagarnir í bili. Spurning um að hoppa upp í lest og fara í óvissuferð bara! Og þó, miðað við heppnina mína þessa dagana er það líklega að storka örlögunum.
Ég sé til hversu huguð ég er á morgun ;o) Góða helgi elskurnar!

Haust í loftinu

Það er haust í lofti hér í Danaveldi, enda allt í einu komin september (bara sísona).
Búið að vera leiðinda skúraveður undanfarna viku eða svo, svo það er ómögulegt að klæða sig eftir aðstæðum (aðstæðurnar breytast stöðugt). Ég hef hins vegar verið afar ánægð með "Kálorminn", nýju rándýru regnkápuna mína. Ef þið furðið ykkur á nafninu getið þið séð hana hér (liturinn á myndinni er samt of daufur). Tek fram að ég keypti hana ekki út á útlitið - það er bara tær snilld að vera í henni því hún er næfurþunn og létt en algjörlega vatnsheld og með loftgötum undir höndunum svo maður sé ekki alveg soðinn. Nú vantar mig bara ný gúmmístígvél og þá er ég klár í danska haustregnið.
Annars lítið að frétta, Árósaferðin var voðalega hugguleg en fullkomlega skandalalaus. Svo er bara klikkað að gera í vinnunni og lítil orka til að hugsa um nokkuð annað. Fór nú samt og sá District 9 í bíó og skemmti mér vel - ekki mynd sem hentar öllum, en skylda fyrir sci-fi aðdáendur.
Vantar núna einhvern til að fara með mér á Inglorious Bastards - SKAL sjá hana í bíó.
Vinnupartý á föstudaginn og ég ætlaði eiginlega ekki að fara en vinnufélagarnir sögðu að þetta rólegheitalíf á mér væri að eyðileggja fyrir þeim glansmyndina af einhleypingjunum sem eru stanslaust að skemmta sér... Andskotans Sex and the City er búið að byggja upp fullkomlega óraunhæfar væntingar til einhleypra kvenna yfir þrítugt! Ég hef hvorki aðstæður eða orku í að djamma hverja helgi - er búin að liggja eins og slytti í sófanum meira og minna alla þessa helgi og ægilega sátt með það bara. Maður er orðinn svo gamall...

Sauður

Ég er búin að vera með ljótuna á háu stigi undanfarið og ákvað loksins að gera eitthvað til að hressa mig við: lita upplituðu ullina á hausnum á mér. Og þar sem ég er búin að vera með sama litinn í meira en ár, ákvað ég að það væri komin timi á að prófa eitthvað nýtt og keypti skol sem lofaði fallegum ljósbrúnum lit...
OG NÚ ER ÉG SKOLHÆRÐ! Gamli klassíski íslenski sauðaliturinn - AAAARGH!
Sem betur fer átti ég kaldan bjór sem er núna að hjálpa mér að skola niður tárunum.
Er að fara í plokkun á morgun (annar liður í sjálfshjálparátakinu) og er núna alveg sannfærð um að hún muni plokka þar til ég líkist hræddum trúð! Það væri alveg kórónan á verkið.
Er annars að fara til Árósa á fimmtudaginn, í langt helgarfrí - held ég geti lofað að sætu strákarnir í Árósum (háskólabær - alltaf fullt af fallegum ungum mönnum)munu ekki eiga erfitt með að standast mig - því er nú fjandans ver og miður!
Ekkert annað að gera í stöðunni enn að hella sér í bjórinn um helgina - ekki að ég fríkki við það, en mér verður allavega andskotans sama!
Svo ef þið dettið í það um helgina megið þið skála fyrir aulanum í Árósum - kannski mér takist að verða svartur sauður áður en helgin er búin ;o)

Gæti verið skýringin...

Verslunarvíkingur

Ég fór tvær ferðir í bæinn um síðustu helgi til að kaupa mér brjóstahaldara. Laugardaginn kom ég heim með eina bók, sunnudaginn með föndurgræjur (er komin úr andleysi í ofurskapandi stuð)en engan brjóstahaldara. Svo ég lét mig hafa það að fara enn eina búðarferðina í gær - þrátt fyrir að hitinn slagaði í 30 gráður (ömurlegt að máta föt í svona hita). Og mér tókst ekki bara loksins að kaupa brjóstahalda, heldur kom ég heim með buksur, jakka og skyrtu í ofanálag. Veit ekki alveg hvað gerðist - minningarnar eru hálf óljósar, en það virðist hafa runnið á mig alvöru íslenskt verslunaræði! Vona bara að það hafi ekki verið froða við munnvikin...
Það er laaaangt síðan ég hef tekið svona syrpu - náði samt að bremsa mig af áður en ég keypti skó líka! Þarf ekki fleiri skó - en var samt næstum komin að kassanum með par af sandölum þegar berserksgangurinn fór að renna af mér.
Annars svosem lítið að frétta, hef lítið nennt að vera úti í hitanum en í staðinn dundað mér við að lesa skáldsögur eins og vindurinn, prjóna (af tómri sjálfspíningahvöt) og jafnvel teiknað aðeins (sem hefur ekki gerst lengi). Helgin fór að miklu leyti í að taka alla seríu 1 af Pushing Daysies (reyndar bara 9 þættir) og var því bara hin ánægjulegasta :o) Hef reyndar lúmskan grun um að allur þessi dugnaður minn í dundinu eigi rætur sínar í stóra pappakassanum með 400.000 ósorteruðum ljósmyndum sem bíður eftir að ég taki mig saman... Það er alveg með ólíkindum hvað maður getur fundið sér að gera ef það bíður eitthvað svona eftir manni.

Andleysi

Ég er búin að vera hrikalega andlaus eitthvað allan júlí - veit ekki hvort þetta er bara almennt orkuleysi (dregst varla út fyrir dyr) eða hvort þetta er "haustlægðin" mín komin óvenju snemma útaf lélegu dönsku sumri. Ég er allavega orðin hundleið, bæði á andleysinu, orkuleysinu og sjálfri mér almennt. Mun sparka í eigið rassgat um leið og ég hef orku til að lyfta löppinni...

Flæðirit fyrir þá sem ekki geta haldið sér saman á ögurstundu...

Ég veit fátt verra en fólk sem reynir að halda uppi samræðum við mig þegar ég er að einbeita mér að einhverju allt öðru. Og ef það sem kemur út úr þeim er svo algerlega óviðeigandi í ofanálag... aaarhg! Tekur mann alveg úr stuði :o(
Ég er að spá í að prenta þetta út og afhenda næsta bólfélaga - ef ég kefla hann ekki bara...

Góða helgi ;o)

Ég vissi það!

Breskir vísindamenn hafa komist að því að kettir eru búnir að þróa sérstakt mal til að fá sínu framgengt hjá manneskjum. Ekki það að kattaeigendum um allan heim hafi ekki (að einhverju leyti allavega) verið búið að gruna þetta lengi, en nú er það sannað svart á hvítu. Haldiði ekki að litlu lúsablesarnir séu ekki búnir að fatta að ef þeir mala á vissri tíðni (sem er svipuð tíðni og í ungbarnagráti) eru dósaupptakararnir þeirra mun fljótari að stökkva til og gera eins og til er ætlast...
Þeir nota þetta víst aldrei sín á milli blessaðir. Þar hafiði það svart á hvítu - þú getur kallað þig "eiganda" þar til þú ert blá/r í framan en það er kötturinn sem stýrir leiknum ;o)

Meira hér

Og sjálf vísindagreinin hér

The Bitch is back...

Komin aftur til Danaveldis eftir góða, en stutta (fannst mér), dvöl á eldgamla Ísafoldi. Danmörk tók á móti mér með 29 gráðum og rakavegg sem gerði að verkum að ég var gegnvot af svita áður en ég var komin í gegnum “ranann” frá flugvélinni inn í flugstöð. Laugardagurinn var álíka slæmur og ég er eiginlega hissa að ég andaðist ekki! Sem betur fer var það síðasti hitabylgjudagurinn og ég hef aldrei verið jafnsæl yfir að sjá veðurspá upp á skúraveður í heila viku...
Er annars bara að reyna að höndla grákaldan veruleikann aftur, enda orðin svo ofdekruð eftir fríið að það hálfa væri nóg...
Það bíður mín tonn af þvotti í þvottakörfunni og hellingur af pósti sem á eftir að ganga frá, en mér hefur enn ekki tekist að finna nennuna – og ég er heldur ekki að meika að þurfa aftur að sjá um innkaup og matargerð! Svo það ég hef lifað á Cherioos pakkanum sem ég smyglaði með mér, en nú er hann búinn og ég neyðist víst til að herða mig upp á eftir og versla í matinn (síðasta tilraun endaði með 2 undanrennum – það var allt sem ég hafði ímyndunarafl í!).
Veit einhver um ódýran einkaþjón og kokk?

Letihaugur

Ég er svo löt í dag að ég nenni varla að anda! Danir halda afmælisdaginn hennar Önnu minnar (og Kaspers míns) hátíðlegan svo ég er í fríi - sem er líklega eins gott því ég er haugur í dag. Það stendur poki með óhreinu taui úti við dyr og bíður eftir að komast í færi við þvottavél, en miðað við að hann hefur ekki færst úr stað síðustu 5 tíma má leiða að því líkum að hann verði að skríða út í þvottahús sjálfur...
Ætti að fara út og hreyfa mig eitthvað en það er kalt og skýjað og möguleiki á skúrum, svo kötturinn í mér neitar að setja loppu út fyrir dyr! Í staðinn er ég búin að hanga á Facebook, setja nýtt persónulegt met í Scrabble, hlusta á nýja músík og vaska pínulítið upp (bara pínulítið sko!) og drekka sem svarar til 18 espressóbolla af kaffi! Og ef ég gæti nú bara fundið og þaggað niður í litla leiðinda samviskubitinu sem tuðar einhversstaðar í undirmeðvitundinni væri ég bara alsæl með þetta allt saman. Ótrúlegt hvað maður getur gert sjálfri sér lífið leitt!
Annars lítið að frétta, á bara eina viku eftir í vinnunni fram að fríi. Sem verður reyndar ekki alveg jafn friðsælt og ég hefði kannski getað óskað mér, en það verður samt tilbreyting að vera ekki að vinna. Og svo styttist óðfluga í að ég komist á klakann og ég vona að veðurguðirnir brosi til mín loksins þegar ég kemst heim að sumarlagi. Síðustu 2 vinnudagarnir fara fram á Helsingjaeyri þar sem deildin mín á að halda einhverskonar "teymisdaga" - þar sem ég sit núna í markaðsdeildinni á ég alveg eins von á að þetta verði eitthvað hrikalega amerískt "nú ætlum við öll að kynnast hvort öðru og haldast í hendur" dæmi, en það kemur víst í ljós.
Góða helgi elskurnar - og munið að slappa af!

Gátan leyst!

Klikkið á myndina til að sjá hvað er í gangi...

Rafmagnað andrúmsloft

Klukkan korter yfir þrjú í nótt vaknaði ég við þvílíka brakið og lætin - herbergið mitt var eins og diskótek með strobeljós á fullu og ég hélt eitt andartak að móðurskipið væri komið til að sækja mig... Þetta reyndist vera eitt klikkaðasta þrumuveður sem ég hef upplifað hér, eldingarnar komu svo hratt að það varla náði að verða dimmt á milli og þrumurnar voru svo öflugar að gluggarnir nötruðu. Ég brölti út í stofu og reif allt úr sambandi því ég hef víst heyrt einhverntíman að ef það slær eldingu í húsið grillast öll tæki sem eru í sambandi. Svo skreið mín aftur í ból, tróð eyrnatöppum í eyrun, breyddi sæng yfir haus og steinsofnaði aftur í öllum djöfulgangnum! Ég hlýt að hafa verið illa þreytt. Er víst von á annarri svona lotu í nótt - en hins vegar þarf ég ekki að mæta í vinnuna í fyrramálið ;o) Kannski ég vaki bara og horfi á eldingashowið? Fátt betra til að minna mann á hvað maður er lítill og ómerkilegur í samanburði við náttúruöflin.

Að lokum smá gleðigjafi svona fyrir frídaginn á morgun - það er komin trailer fyrir Sherlock Holmes myndina hans Guy Ritchie! Því miður þurfum við líklega að bíða fram á næsta ár eftir henni - aargh!

Save a horse - Ride a Cowboy

Þar sem ég er alveg andlaus þessa dagana verð ég enn einu sinni að láta nægja að deila því sem kætir mig...

Eftirfarandi atriði úr America's got talent fékk mig ekki bara til að brosa, ég fékk andskotans lagið á heilann í tvo daga! Njótið :o)

Nördahúmor með köttum - getur það orðið betra?

see more Lolcats and funny pictures

Mr Booth, do you know what the penalty is for an overdue book?

Datt inn í þennan þátt af Bones í vikunni og hló mikið þegar Booth kom upp um bókavarðafantasíuna sína (sem sést í þessum trailer fyrir þáttinn)
Hann ætti bara að koma til mín (þótt ég geti nú ekki lengur sett hárið upp!)
Ég skal sko sýna honum hver sektin er fyrir að skila of seint :oP

Mubluátak 2

Tók mig loksins saman og byrjaði mubluátak 2. Mubluátak 1 fór fram síðasta haust þegar ég verslaði húsgögn í svefnherbergið mitt og eyddi 2 dögum í að setja draslið saman. Verð nú að segja að ég er voðalega ánægð með útkomuna, en mig hefur ekki beinlínis hlakkað til að gera þetta aftur! Hins vegar var orðið beinlínis neyðarlegt að sitja hér með hálftóma stofu og flottar svalir sem ég er ekki að nota bara vegna þess að ég hef ekki getað tekið mig saman. Svo mín fór í IKEA eftir vinnu með þá stefnu að ég fengi ekki að fara heim nema vera búin að velja stóla og bókahillur í stofuna. Það tók mig 3 tíma innan um organdi börn og pör í rifrildum að komast að endanlegri niðurstöðu, borga og semja um að ég fái vörurnar fluttar heim í kvöld. Einhversstaðar á bilinu 15-21 svo ég er í stofufangelsi í 6 tíma... og þótt ég hafi svosem ekkert að gera út á þessum tíma veit ég að ég verð eins og fló á skinni bara af því að ég má ekki! Svo verður líka afar spennandi að sjá hvort ég get fengið bílstjórann til að hjálpa mér með það þyngsta hér upp tröppurnar... spurning um flegin bol og push-up haldara?
Ég sé hvorteðer ekki fram á að halda sjálfsvirðingunni ef ég enda með að þurfa að banka uppá hjá nágrönnunum til að fá hjálp við að drösla þessu upp.
Keypti mottu á svalirnar sem ég dröslaði sjálf heim í strætó og er komin á sinn stað. Áður en ég setti mottuna á gólfið þurfti ég náttúrulega að sópa svalirnar og hef örugglega náð að gera 100 litlar kóngulær heimililslausar ef eitthvað er að marka alla litlu vefina í hornunum. Er mest hrædd um að næst þegar ég fari út bíði mín hópur af fúlum litlum áttfættum mótmælendum! Í hefndarhug...

Bíó og meira bíó...

Fór að sjá teiknimyndina Coraline í þrívídd - og þá meina ég ekta þrívídd með gleraugum og öllu. Hrikalega gaman - bæði vegna þess að myndin er mjög góð og vegna þess að ég hef ekki farið á alvöru bíómynd í þrívídd síðan við Þórir fórum á (ég held það hafi verið) "Benji the Hunted" árið 1987 og þá erum við að tala um 80's þrívídd hér með grænu og rauðu pappagleraugun!!! Það var svolítið öðru vísi reynsla... sem betur fer! Ég og mitt innra barn vorum allavega voða lukkulegar eftir þessa bíóferð :o) Þeir eru líka að sýna Nightmare before Christmas i 3D núna (það er kvikmyndahátíð í Köben) og mig dauðlangar, en efast um að ég komist, því miður. Og svo er náttúrulega þessi frumsýnd í kvöld... hver vill með í bíó!?!?

Andleysi

Hallúúúú!

Nei ég er ekki dauð - bara andlaus. Búin að vera voðalega þreytt eitthvað síðan ég kom heim aftur eftir Berlínarferðinni. Kem heim úr vinnunni og velt um koll í sófann þar til það er kominn tími til að skríða í bólið aftur. Þið kannist örugglega við þetta.
Anyway - Berlín var sérstök upplifun. Þessi gamla borg er undarleg blanda af fegurð og ljótleika sem bæði tengjast sögu hennar. Borgin er full af glæsilegum gömlum húsum, styttum og minnismerkjum sem vitna um forna farsæld, en líka full af minningum um seinni heimstyrjöldina og kalda stríðið svo maður er stanslaus minntur á hversu skelfilegar afleyðingarnar geta orðið þegar öfgarnar fá að ráða.
Ég á örugglega eftir að fara þarna aftur einhvern tíma.
Annars pínulítið farin að telja niður fram að sumarfríinu - þetta styttist jú!
Hlakka mikið til að koma heim að sumarlagi loksins! Dauðlangar að nota tækifærið og ferðast aðeins innanlands, en á eftir að sjá hvort ég get lokkað einhvern/einhverja með mér í svoleiðis (wink wink, nudge nudge). Ég hef til dæmis aldrei séð Jökulsárlón og það er orðið pínlegt að þurfa að játa það fyrir öllum útlendingunum sem ég hitti sem hafa verið þar! En það verður allt að koma í ljós.

Hafið það gott elskurnar - lofa að reyna að vera duglegri að blogga!

Hinn eini rétti er kannski við hendina bara?

Vampírur á vorin

Það er sólríkur föstudagur, klukkan er 15 og ég nenni ekki að vinna meira! En ég er búin að lofa að vera 20 mínútur og passa notendaþjónustupóstinn. Fólk sem situr inni á föstudagseftirmiðdag og nennir að skrifa kvörtunarpósta á ekki skilið annað svar en : “GET A LIFE!”. Eins og þið sjáið er þjónustulundin að drepa mig :o)
Vorið er brostið á af fullum krafti aftur – hitinn allt í einu komin upp í 2 tölustafi og meira að segja sólskin mest af tímanum. Litla vampíran ég er að berjast við: a) sólarofnæmi, b) augu sem þola illa sterkt ljós og c) húð sem brennur á örfáum mínútum þrátt fyrir sólarvörn í dagkreminu. Ég neita nú samt að láta þetta eyðileggja fyrir mér vorið og ætla bara að redda mér: a) histamíni, b)nýjum sólgleraugum og c) sólkremi með faktor amk. 30. Þetta er verkefnalisti morgundagsins!

Í kvöld er planið að leggjast í páskabjór og nostalgíu með Rikke vinkonu minni – við ætlum að horfa á 80’s klassíkerinn “The Lost Boys”, sem var í miklu uppáhaldi hjá okkur báðum þegar við vorum gelgjur. Ég man bara að ég féll kolflöt fyrir Kiefer Sutherland, bestu vinkonum mínum til mikillar hneikslunar (þeim fannst hann svo hrikalega ljótur) - og að mér fannst soundtrakkið ÆÐI! Hef reyndar grun um tónlistin hafi nú kannski ekki elst jafn vel og Kiefer (sem hefur ekki breyst svo mikið á 23 árum þótt hann verði nú seint talinn fallegur greyið) ;o)

Annars á bara að njóta blíðunnar um helgina – og krossa fingur og vona að góðviðrið sem er í Berlín núna haldist fram yfir páska...

Góða helgi!

halelúja!

Ég er aftur komin með net hér heima. Ekki það að ég hafði örugglega gott af pásunni - las heilar 3 bækur á þessari rúmu viku og hvíldi "músarúlnliðinn" minn aðeins. En verð að segja að ég er voða fegin að vera komin aftur í samband við umheiminn minn - og til að sýna ánægju mína ætla ég að deila svolitlu með ykkur (Dóa - þú gætir þurft að hafa kalt vatn við hendina)



Hef ekki grænan hvenær þessi kemur út - en bíð spennt!

Sambandslaus...

Á laugardaginn komst ég ekki á netið heima hjá mér. Tók því með ró, var með góða bók við hendina og var ekkert að stressa mig yfir þessu. Komst heldur ekki á netið á sunnudaginn – ekkert alltof ánægð með það, en ekkert stórmál. Nú er hins vegar fimmtudagur og ég er orðin ansi pirruð enda búin að eyða fleyri tímum í að reyna að finna vandamálið – prófa allar leiðbeiningar og “sjálfpróf” sem ég hef fundið og samkvæmt því er ekkert að! Routerinn virkar og tölvan virkar en ég fæ bara ekki *#!!**%&! netsamband! Ætla að gera enn eina tilraun til að endurstilla Windows uppsetningarnar í kvöld og ef það virkar ekki prófa ég að hringja til “þjónustulínu” TDC. Mest hrædd um að ég verði orðin svo fúl á þeim tímapunkti að það sjóði illa uppúr hjá mér ef þjónustufulltrúinn er ekki almennilegur. M.ö.o.: ef ég lendi á manneskju sem talar við mig eins og ég sé fimm ára og þroskaheft (“...ertu viss um að það sé kveikt á tölvunni?”), er hætt við að það verði óvænt eldgos í Herlev...
Fjarvera mín frá öllum samskiptaforritum síðustu viku eða svo er sumsé ekki mannfælni að kenna – tæknin er ekki bara að stríða mér heldur pynta mig þessa dagana.
Hlakka til að “sjá” ykkur online – vonandi innan skamms!

Fyrir Nathan Fillion aðdáendur

You know who you are! Fyrstu 13 mínúturnar af nýju seríunni hans, Castle.



Enjoy!

Partýdýrið ógurlega...

...er að pakka niður fyrir næstu djammferð! Ekki það að ég hefði alveg getað þegið smá bil á milli afmæla - er enn að jafna mig eftir að hafa hjálpað Dóu að halda uppá afmælið 2x á sama sólarhringnum! Gamlar hvað?!?
Voða gaman í Amsterdam - Cornellinn stóð ekki undir væntingum og verður í skammarkróknum allavega næstu mánuði - jafnvel árin ef hann tekur sig ekki saman!
Reykingabannið í Amsterdam kom mér frekar spánskt fyrir sjónir - skrýtið að vera inni á skemmtistað þar sem verið er að reykja jónur allt í kringum þig en bannað að kveikja í sígarettu! Og svo fer ég "heim" til Árósa eftir vinnu á morgun til að hjálpa Julie vinkonu til að sætta sig við 30 afmælið - fer líklega svona fram: "Hættu þessu væli krakkakrílið þitt og fáðu þér meira í glas!" Neita að hlusta á aldurskompleksa frá unglömbum... ;o)

Góða helgi elskurnar og ekki gera neitt sem ég myndi ekki gera!

Hvar er bjórinn?!?

Ég er farin að hafa áhyggjur af þessu áfengisvandamáli mínu :o( Ég meina: er það normalt að búa í landi þar sem er seldur bjór alls staðar og ekki einu sinni detta í hug að taka bjór með í kaupfélaginu þegar maður verslar? Svona hefur það verið síðustu árin. Ég held kannski að vandamálið hafi byrjað þegar ég flutti á vistina og komst upp á lag með að það var alltaf bjór í húsinu - eina sem ég þurfti að pæla í ef mig langaði í bjór var að sjá til þess að bjórinn færi í ískáp! Og svona var það líka á meðan ég leigði með Kasper - hann kom með bjór í kassavís frá þýskalandi og mitt "job" var bara að sjá til þess að það væri alltaf nokkrir í ísskápnum og í staðin mátti ég drekka það sem ég vildi... Svo þetta með að ég þurfi sjálf að sjá til þess að það sé bjór í húsinu - ekki alveg að gera sig! Og ástæðan fyrir þessari ræðu er náttúrulega að núna langar mig í kaldan bjór og auðvitað gleymdi ég að kaupa... Ég verð greinilega bara að bíða þar til á morgun - ég veit að Dóa klikkar ekki á því að eiga bjór í ísskápnum! Er búin að pakka (nema tannbursta og svona það sem maður tekur á síðustu stundu) og nú er bara að telja niður :o)
Amsterdam - here I come!

Og að lokum - skoðanakönnun lauk með 4 atkvæðum gegn 2 Manni vikunnar í hag, svo hér með er sá fasti liður endurvakinn - vonandi að þið njótið þess.

Confessions of a domestic goddess...

Enn ein vikan flogin hjá og ég verð að segja að þetta er langþráð helgarfrí! Eða frí og ekki frí, morguninn fór í að bæta upp fyrir heimilisverkin sem hafa setið á hakanum síðustu vikur og nú er ég gjörsamlega búin á því eftir átökin. En eins og ég hata að þrífa þá eeeeelska ég afraksturinn (þ.e. hrein og hugguleg íbúð!) ;o)
Fréttir síðan síðasta blogg? Látum okkur sjá... Myndlistarnámskeið var stórskemmtilegt en erfitt (þess vegna var ekkert þrifið síðustu helgi) - á örugglega eftir að leika mér eitthvað með málningu og pensla hér heima í framtíðinni. Hér er enn hvít jörð, þótt mér skiljist að það gæti farið að rigna á næstunni - er að vona að það þýði að vorið fari að nálgast. Ég nenni ekki að hafa vetur lengur!
Horfði á The Mummy 3 í gærkvöld og stökk ekki bros í eitt einasta skipti - þetta var svo sorglega vond mynd og eina gleðin sem ég hafði af henni voru þær mínútur sem Brendan Fraser var ber að ofan (ég er það aðþrengd þessa dagana að það þetta var hápunktur kvöldsins!). Aumkunarvert, ég veit! Mér til varnar var gamli bara í þokkalega góðu formi! ;o)
Og fyrst við erum á dónakerlinganótunum : ég var eiginlega búin að ákveða að fylgjast ekki með Óskarnum í ár því að ég er hreinlega orðin of gömul til að höndla að mæta í vinnu á mánudagsmorgni meira og minna ósofin. Hins vegar er Hugh Jackmann kynnir í ár - og ég var að lesa þessa tilvitnun í hann: "One of my favorite moments at the Oscars was when the streaker came across [past] David Niven. And we're upping it a level and we're just going to do most of the show naked. Um, well, there hopefully will be YouTube moments….Drunk and nude, yes. So that's our new fresh approach. It's the Australian way.". Ef ég væri ekki svona viss um að hann hafi að djóka myndi ég svei mér þá fórna nætursvefninum!

TGIF!

...Thank God It's Friday! Þrettándi eða ei - mér er sama!
Búin að vinna eins og brjáluð alla vikuna, er alltaf að bíða eftir að það róist en einhvernveginn virðast verkefnin bara hrannast upp. Annars eru þau stórtíðindi frá Danaveldi að í dag var fyrsti heiðskíri dagurinn síðan... ja ég man hreinlega ekki hvenær, en ég er nokkuð viss um að það var fyrir jól! Nóvember jafnvel... Smá föl á jörðinni og skítkalt (spáð 10 gráðu næturfrosti yfir helgina) - en sólin er þess virði! Smeygði mér út fyrir eitt augnablik í dag til að njóta sólarinnar og það var eins óg í vampírumynd bara - sólarofnæmið sló til með það sama og ég mátti flýja inn áður en ég leystist upp í öskubunka. En það náði samt ekki að eyðileggja fyrir mér ánægjuna af birtunni - ég varð bara að njóta hennar út um gluggann.
Er svo að fara á námskeið í akrýlmálun um helgina - ætti að verða voða gaman þótt ég efist stórlega um að það komi nokkuð listaverk út úr því. Hver veit - kannski ég sé næsta undrabarn listaverkaheimsins? Það er "listamaður" hér í landi sem er mest frægur fyrir að hafa pissað í vatnsskúlptur eftir Ólaf Elíasson og kallað það gjörning! Svo það þarf víst ekki mikið til að fá þann titil ;o)
Hef hvorki haft orku né tíma til að finna nýjan brandara vikunnar, svo ég ákvað að gefa lesendum bloggsins færi á að tjá sig í staðinn - segiði svo að það ríki ekki lýðræði hér á síðunni!
En nú ætla ég að fá mér bjór og leggjast í leti - góða helgi elskurnar.

If I gotta suffer...

... you gotta suffer!




Það fer svo alveg eftir ykkur sjálfum hvers kyns þjáning þetta er :o)

Endalaus grámi...

Allt í einu er búin vika af febrúar - ekki það að ég hafi tekið mikið eftir því að tíminn líði því það er meira og minna búið að vera sama vinnustressið og sami andskotans kuldinn og gráminn samfleytt síðan ég kom til baka úr jólafríinu. Ég er ekki frá því reyndar að það hafi verið örlítill sólargeisli sem vakti mig í dag, en hann var allavega horfinn áður en ég komst á lappir.

Ég hélt aldrei að ég myndi láta þetta út úr mér - en ég held ég sakni snjósins...

Eða réttara sagt: ég sakna fallegu köldu vetrardagana heima með snjó og sól! Gefðu mér 10 gráðu frost og snjó á jörðu í nokkra daga ef ég bara fæ sól og logn með! Held ég sé komin með D-vítamínskort af hreinu sólarleysi og spáin er svona:

Veit ekki hvort þið náið að sjá að hitastigið hangir mest yfir frostmarkinu svo þetta þýðir slydduógeð sem nær kannski að frjósa í svellbunka yfir nóttina svo það verður glerhált að staulast í vinnuna í grámanum á morgnana. Ojj bara! Og þessi sól á köflum virðist þýða að það gæti sloppið einn geisli í gegnum skýin á nokkurra tíma fresti - maður þarf að vera ansi heppin að vera akkúrat utandyra þær sekúndur sem það varir!

Ég veit að það er bara febrúar en ég er búin að fá nóg af vetrinum og nenni ekki meir! Spurning um að skrifa "Helvítis fokking fokk!" á skilti og mótmæla fyrir utan dönsku veðurstöfuna? Heimta að vorinu verði flýtt eða veturinn að minnsta kosti gerður sólríkari? Maður fengi þá allavega útrás fyrir pirringinn!

Eða kannski bara læra af reynslunni svona til tilbreytingar og plana sólarlandatúr í febrúar á næsta ári...

Flugvélamatur

Ég veit ekki með ykkur, en ég hef lent í þó nokkrum flugvélamáltíðum þar sem ég hef virkilega spáð mikið í hvað ég væri eiginlega að borða því hvorki útlit né bragð gaf nokkra vísbendingu. Ég hef meira segja einu sinni alvarlega íhugað að borða frekar umbúðirnar - þær gætu hvorki bragðast verr eða verið næringarsnauðari en maturinn sjálfur. Ég hef alltaf liðið í hljóði (eða látið nægja að kvarta við ferðafélaga mína - sem yfirleitt hafa verið mér sammála N.B!). Þess vegna fylltist ég aðdáun þegar ég las þetta kvörtunarbréf til Richard Branson eiganda Virgin Airlines. Og hló mikið... Svona á að gera þetta! Ekkert nægjast með að bölva í hljóði eða nöldra við nágrannann heldur gera eitthvað við þessu. Og myndir segja meira en 1000 orð...

Það fylgir sögunni að Branson hafi seinna hringt í bréfritarann og boðið honum að koma í eldhúsið til að hjálpa við að velja nýjan matseðil - sel það ekki dýrara en ég keypti það!

Skil hann vel!

Hey Big Spender!

Ég á voðalega erfitt með að kyngja þessari rannsókn - allavega eins og blaðið setur dæmið upp, en kannski maður ætti að fara að krefjast þess að sjá reikningsyfirlit og síðustu ársskýrslu áður en maður fer heim með einhverjum? Svo maður sleppi við "gúmmítjékka"...

Fjésið

Ég er enn ekki orðin sannfærð um ágæti Fjésbókarinnar - ég hef að vísu náð að fá (lauslegt) samband við fólk sem mig hefur lengi langað að heyra frá og það er hið besta mál, en annars get ég ekki sagt að Fjésið sé að gera neitt sérstakt fyrir mig.
Hef hvorki tíma né þolinmæði fyrir spurningakannanirnar og veit ekki hvað í ósköpunum maður á að gera við allt hitt "dótið" sem veltur inn - eini tilgangur þess virðist vera að senda það áfram! Eða er ég að misskilja eitthvað?

Verra er að ég veit hreinlega ekki hvað ég á að gera við skilaboð frá fólki sem ég var með í barnaskóla fyrir 100 árum síðan og man eiginlega ekki eftir! Getur einhver útskýrt fyrir mér hvað fær fólk til að setjast niður með gamla bekkjarlista og grafa upp fólk sem það þekkti sem börn? Ég er ekki að hæðast að neinum eða skammast út í þetta - mig langar í alvöru bara að skilja þetta!

Það er eitthvað svo víðs fjarri mér að elta uppi fólk sem ég hef ekki haft neitt samband við síðan ég var krakki. (Fyrir utan náttúrulega að ég man hvorki nöfn né andlit sérlega vel - svo ég myndi ekki vita hvar ég ætti að byrja!).
Kannski er það bara vegna þess að ég gekk í 4 barnaskóla og náði eiginlega ekki að mynda nein sterk bönd við bekkjarfélaga fyrr en á unglingsárunum - en persónulega verð ég að segja að ég hef ekki grænan hvað maður á að tala um við einhvern sem maður var í bekk með fyrir meira en 20 árum síðan! Fyrir utan að ég er svo hroðalega minnislaus að ég sé fyrir mér að allar tilraunir til samræðna fari eitthvað á þessa leið:

S: "Mannstu eftir ...(bekkjarfélögum/kennara/atburðum/einhverju)..."?
E: "Öhh.. nei"

Endurtakist eftir þörfum þar til samræður enda í vandræðalegri þögn.


Er ég illgjörn ef ég get ekki varist þeim grun að það sé kannski keppnin um að hafa sem flesta "vini" á Fjésinu sem fær fólk til að leita uppi alla sem þeir hafa nokkurn tíman hitt? Eða er ég bara síðasta andfélagslega risaeðlan í samfélagi sem er orðið "hyper-social"? Ég veit allavega að ef ég hefði verið að fara að skrifa mastersverkefnið mitt núna hefði ég örugglega kastað mér yfir "vinsældakeppnina" sem virðist krauma undir í öllum félagslegum forritum sem hafa slegið í gegn síðustu ár á vefnum. Kannski ég ætti að skella mér í doktorinn bara? ;o)

Latur laugardagur

Svo er fyrsta vinnuvika ársins búin og maður lifði hana af - það er þó alltaf góð byrjun! Bloggaði eiginlega bara til að deila þessu með ykkur - skammast mín alltaf jafn mikið þegar ég hlæ að svona löguðu, en innst inni er það jú bara léttir yfir að það sé þó einhver sem er jafnvel óheppnari en maður sjálfur! Fyrir ykkur sem ekki nennið/getið lesið dönskuna datt mannræfillinn út úr skíðalyftu, festist, og hékk svona í heilar 15 mínútur áður en honum var bjargað niður.

Gleðilegt ár og allt það

Og takk fyrir það gamla. Eftir yndislegar 2 vikur á gamla góða Fróni er maður komin til baka í nístandi kuldann hér í Baunalandi - á eflaust eftir að taka smá tíma að venjast "lofstlagsbreytingunni". Svaf í ullarsokkum og með hitapoka undir 2 dúnsængum í nótt, með ofnana í botni og það var samt á mörkunum að ég næði að halda á mér hita! Sé mikið eftir því núna að hafa ekki tékkað á rafmagnsteppi í fríhöfninni :o/
Notaði daginn í gær til að taka til og þrífa íbúðina - bara til að rústa eldhúsinu aftur í dag. Vaknaði með brjálaða fyrirtíðarspennu og ákvað að virkja hana í eitthvað gagnlegt svona einu sinni svo ég henti mér í að mála í eldhúsinu. Er núna að bíða eftir að umferð 2 þorni svo ég geti tekið umferð 3 (sé fram á að það þurfi 4 umferðir ef ég á að verða sæmilega sátt). Næ líklega ekki að klára alveg í dag - en það verður þá létt verk að rumpa restinni af næstu helgi :o)
Hundfegin að vera komin í gang með þetta - það hefði verið alveg eftir mér að fresta þessu og fresta mánuðum saman - og það verður voða næs að vera búin að þessu. Og þá fær fína nýja eldhúsið jú líka loksins að njóta sín til fulls!
Og ég get farið að takast á við vandamálið með undarlegu stofuna mína (sem er svo asnaleg í laginu að ég get ómögulega fundið út úr hvernig ég á að innrétta hana).
En fyrst: umferð 3! Kannski ég ætti samt að finna mér hárteygju fyrst - mér tókst að sletta málningu í hárið á mér áðan og ég má bara ekki við fleíri hvítum hárum...