timbur

Og svo fer litla paddan í smá bæjarferð og skilar sér fyrst heim um klukkan 15 daginn eftir - ekki dauð úr öllum æðum enn. En nú er það vídeó og nammi með timburmönnunum. Hafið það huggulegt elskurnar.

Post - júróvisjón

Úps! Er orðið svona langt síðan ég bloggaði síðast? Þetta er náttúrulega engin frammistaða! Látum okkur nú sjá - hefur nokkur skapaður hlutur gerst síðan síðast? Öhh? eiginlega ekki. Jú - það var náttúrulega Júróvisjón! Og það var talsvert öðruvísi en venjulega hjá mér. Í staðin fyrir að drekka mig fulla í góðum félagskap og gera grín að lélegri músík og enn verri klæðaburði, endaði ég niðri í nýja stúdentahúsinu ÖFUGU MEGIN VIÐ BARINN!
Hafði í einfeldni minni látið vinkonu mína tala mig inná að vera barþjónn hluta úr kveldi og hún hafði talið mér trú um að hér væri á ferðinni svona týpískur "föstudagsbar" sem er 3-4 tegundir af bjór og svo skot af og til. Það taldi ég nú að ég ætti að geta ráðið við þótt ég hefði aldrei verið barþjónn. Ég fékk þess vegna vægt hjartaáfall þegar ég mætti á staðinn og við mér blasir risastór og flottur bar sem er fullkomlega samkeppnisfær við hvaða Reykvískan bar sem ég hef komið inná. Ég og Sarah fengum 5 mínútna kennslu á kassa og kortavél og svo var okkur bara kastað útí djúpu laugina og þar tróðum við marvaðan í 3 tíma. Held reyndar að þetta hafi gengið stóráfallalaust - það kvartaði allavega engin við mig persónulega, en eftir að vaktinni lauk var ég enn edrú og svo búin á því að við fórum bara heim um 2 leitið. Það var ekki aaaaaaaaaaaalveg það sem ég hafði planað, enda var þetta fyrsta skiptið sem ég fer út á lífið síðan í byrjun MARS!
Mér er greinilega ekki ætlað að eiga neitt sem heitir skemmtanalíf í ár.
Og getur maður verið ekta íslendingur ef maður gefur ekki skýrslu um veðurfar? Þið ykkar sem hafið þurft að díla við snjó getið huggað ykkur við að sumarið varaði eina viku hér - síðan er búið að rigna og rigna og rigna og spáð meiri rigningu svo langt sem veðurfræðingar geta séð.
Ég er náttúrulega að reyna að sjá björtu hliðina á bleytunni - það verður að viðurkennast að það er mun auðveldara að sitja föst við tölvuna þegar regnið bylur á glugganum!
Annars á að hanga þurrt af og til í dag og Sarah og ég ætlum að freista gæfunnar og fara á útimarkað við höfnina seinnipartinn. Hversu mikið viljið þið velja að það kemur skýfall þegar við erum búnar að borga okkur inn?
Hvað meira get ég mjólkað út úr þessu endalausa tilbreytingarleysi sem ég kalla líf mitt? Tókst að fara í bíó um daginn - fyrsta skiptið í fleiri mánuði. Sá Match Point - ekki slæm mynd, en kannski full róleg fyrir mig og gerði heldur ekki góða hluti fyrir tiltrú mína á (karl)mannkynið.
Eins og hún væri mikil fyrir...

Hitaslagur

Ég er að sálast - sit með tunguna lafandi við tölvuna og reyni í örvæntingu að fá heilasellurnar til að virka. Heilasellurnar bera við sólstingi og gjörsamlega neita að gera nokkuð sem helst fyrr en hitastigið lækkar. Ég er alvarlega að íhuga að gefa lærdóm uppá bátinn í dag - eða í það minnsta að taka eins og eina fræðigrein með mér niður í grasagarðinn, leita uppi skugga undir snotru tré og sjá hvort heilinn kólnar nægilega niður. Með öðrum orðum - ég er Demitrius í dag (þið sem ekki lesið Discworld verðið bara geta hvað ég meina).
Það er víst allmennur frídagur á morgun, Store Bededag held ég að hann kallist - ég verð að viðurkenna að ég veit ekki hvort og þá hvaða íslenski helgidagur það er. Enda trúlaus andskoti. Veit heldur ekki hvað dagurinn gengur útá, en á óljósar minningar frá síðasta ári um að maður eigi að borða hveitibollur með smjöri um kvöldið - ekki spyrja mig af hverju! Helgin verður líklega bara lærdómur og vinna - sem betur fer á að kólna aðeins og þykkna upp svo það verður ekki alveg jafn hræðilegt að vera innan dyra. Ég veit að ég hljoma hræðilega vanþakklát en það eina sem ég fíla við svona heita sólardaga eru kvöldin - á dagana líður mér bara illa af hitanum. Ég er hreinlega ekki hönnuð fyrir svona veður! Eini ljósi punkturinn eru hálfnaktir stæltir strákar útum allt - kvarta ekki yfir því...

Sól skín í heiði

Miðvikudagsmorgun, sólin skín, fuglarnir syngja og ég sit inni á sjóðheitri skrifstofu og reyni að þrælast gegnum fræðigreinar... Oh joy!
Annars allt gott að frétta úr Pöddulandi - fór óvænt út á lífið á föstudagskvöldið og hafði bara gaman af, þótt ekki væri tekið hraustlega á því þetta skiptið.
Og á föstudaginn er náttúrulega hápunktur ársins: Kapsejladsen í Universitetsparken.
Í stuttu máli sagt er þetta svar háskólanema í Árósum við kappróðrum þeim sem stundaðir eru við Oxford. En þar sem við erum að tala um dani er stíllinn talsvert annar en hjá bretunum. Hinar ýmsu námsbrautir (og nokkrir fulltrúar frá öðrum skólum) keppa um "hið Gullna Bekken" (já - bekken eins og á spítölum). Reglurnar eru (að því að mér skillst): hvert lið hefur 5 meðlimi og liðin taka með eigin "bát" (lesist: eitthvað sem flýtur og er án vélarafls). Einungis einn liðsmaður má vera í bátnum í einu. Þessi eini liðsmaður á að róa yfir lækinn, drekka einn bjór eins hratt og hann getur og svo snúast 10 hringi um sjálfan sig áður en hann rær til baka. Markmiðið er að fá alla liðsmenn til baka fyrst. Það keppa 2 lið í einu og 2 fljótustu liðin fara í undanúrslit. Það þarf varla að taka það fram að þetta er hreinn og klár sirkus - en líka frábær skemmtun og afsökun fyrir að eyða föstudagseftirmiðdegi úti í sólinni með kaldan bjór í hendi - og ekki kvarta ég yfir því...
Svo er bara að krossa fingur og vona að veðurspáin standist.