örpóstur

sælinú,

bara örstuttur póstur (er að stelast í vinnunni) - ekkert að frétta úr skotgröfunum, lærdómur og vinna eins og venjulega. Er orðin svo heilaþvegin að ég veit varla hvaða dagur er - allir dagar hvorteðer meira og minna eins...
Held ég verði að fara að gera heiðarlega tilraun til að sletta úr klaufunum áður en ég drabbast alveg niður!
Fer nú samt eftir því hvort og hvenær ég fæ útborgað :o( Vantaði 40 tíma á síðasta launaseðli og það munar sko um minna!) Notaði síðustu aurana mína til að kaupa afmælisgjöf handa einni bróðurómyndinni í gær og ef ég fæ ekki útborgað í dag verð ég að lifa á poppkorni og vatni yfir helgina (ja eða bjór - hann þarf ég ekki að borga fyrr en um mánaðarmót...) Það er eins gott að drengurinn verði ánægður með gjöfina!
Átti ekki fyrir korti líka, svo hann fær eitthvað frumsamið listaverk - verður eflaust verðmætt seinna þegar ég er orðin fræg. Hefði líklega bara átt að láta listaverkið duga sem gjöf! Hann hefði eflaust orðið svooooooo glaður...

Einn af þessum dögum

Það er einn af þessum dögum. Þessum dögum sem er alltof mikið af undanfarið. Þessum dögum sem ég sit og stari á tölvuskjáinn án þess að sjá hvað á honum stendur eða hafa hugmynd um hvað ég geri næst. Og þegar ég reyni að ná sambandi við heilan á mér fæ ég bara lyftumúsik - það er nákvæmlega ekkert að ske þarna uppi! Getur maður fengið athyglisbrest á gamals aldri eða ætli ég hafi alltaf haft hann og sé bara að versna? Ég er allavega að verða viss um að þetta er ekki eðlilegt - allir eiga sína slæmu daga en þessi viðvarandi skortur á einbeitingu er farin að valda mér áhyggjum satt best að segja. Lumar einhver á töfralausn? Ef svo er, endilega deilið henni með mér svo ég geti klárað þessa andsk... ritgerð og haldið áfram með líf mitt!

föstudagur enn einu sinni

Og allt í einu er komin föstudagur enn og einu sinni! Hvert fór þessi vika eiginlega?
Skellti mér í bíó í gær og sá teiknimyndina Monster House Skemmti mér konunglega - enda myndin gerð fyrir stór börn með svartan húmor. Planið fyrir kvöldið? Þvottahúsið - já, það jafnast ekkert á við að eyða föstudagskvöldi í að þvo þvott! Annars verð ég að viðurkenna að ég er bara nokkuð sátt við það, aldrei þessu vant - er enn ekki búin að jafna mig alveg eftir þynnkuna síðustu helgi...
Svona er maður orðin gömul og lasburða!
Annars bara lærdómur og leiðindi - nema ég skelli mér á bátasýningu með Kasper á sunnudaginn, það hljómar einhvernvegin mun betur að dunda sér við höfnina í 23 stiga hita og sól en að hýrast inni á loftlausri skrifstofu við tölvuskjáinn. Kannski er það bara ég...

micropóstur

Bara örstuttur póstur til að láta vita að ég ER á lífi - bara búið að vera mikið að gera á öllum vígstöðvum. Ekkert sérstakt að frétta - átti góða helgi (fyrir utan skelfilega þynnku á sunnudaginn - hvenær læri ég að drekka ekki rauðvín?) Splæsti á mig klippingu og líkist núna búttuðum púðluhundi - en það ætti varla að skaða mig í ástarmálunum (ef einhver væru) því eins og fjölmiðlarnir hér hafa mikið fjallað um undanfarið er kynlíf með dýrum LÖGLEGT í Danmörku!!! Fékk áfall þegar ég komst að þessu - dýraverndarsamtök hér eru sem betur fer að þrýsta á að þetta verði lagað sem fyrst, enda get ég ekki skilið hvernig einhverjum finnst þetta ekki vera slæm meðhöndlun á dýrum. Hreint ógeð!
En hvað um Það - ritgerðin bíður, mun uppfæra síðuna almennilega á morgun eða hinn...
Stórt knús til ykkar allra frá stressboltanum í danaveldi.

útlegðin framlengd

Jæja dömur og strumpar!
Aldrei þessu vant eru bara stórfréttir úr pöddulandi. Fréttin er sú að ég verð lengur en á horfðist í Baunalandi. Kemur ykkur kannski ekki jafn mikið á óvart og mér - en ég hélt í hreinskilni sagt að ég væri að koma heim næstu mánaðarmót hvort sem mér líkaði betur eða verr, enda sá ég fram á að vera bæði atvinnu- og húsnæðislaus fyrsta október. Á mánudaginn mætti hins vegar stelpan sem ég hef verið að leysa af í vinnunni (hún var í barnseignarleyfi) og tilkynnti að hún kæmi ekki til baka eftir mánaðarmót. Það gerði svo að yfirmennirnir mínir meira og minna grátbáðu mig um að athuga hvort ég gæti ekki verið aðeins lengur, mér var meira að segja boðið að búa heima hjá annarri þeirra ef mér yrði hent út af vistinni!
Svo ég hringdi til stúdentagarðanna og er nú búin að fá leyfi til að búa í herberginu mínu til 30 nóvember. Svo áætluð heimkoma er nú um 1. desember. Fyrir mig er þetta mikill léttir að því leiti að ég á þá séns á að klára helvítis ritgerðina áður en ég kem heim - ég er búin að hafa miklar áhyggjur af því að ef ég færi að vinna fulla vinnu (sem ég yrði að gera heima til að lifa af) myndi ég líklega aldrei ná að klára þetta. Og ég er búin að eyða svo miklum tíma og peningum í þetta nám að það væri hreinlega grátlegt að klára svo ekki síðasta stykkið.
Hins vegar verð ég að viðurkenna að ég var líka farin að hlakka til að hitta vini og vandamenn - er drullusvekkt yfir að missa af útskriftinni hennar Dóu t.d. Og verð að bíða lengur eftir að komast að því hvort Anna getur fengið mig til að líkjast Marylin Monroe... Ég hef stórar væntingar skiluru Anna mín!
Það verður þá bara enn meira að bæta upp fyrir þegar ég loksins skila mér á klakan - uppsöfnuð afmæli og útskriftir sem þarf að drekka fyrir á einu kvöldi!

Vona að enginn verði fúll við mig...

júnkublogg

Piparjúnkur Íslands sameinist!
Bara verð að vekja athygli einhleypra meyja á nýju bloggi http://junka.bloggar.is/
Hér er einstaklega fágaður félagskapur á ferð og mér er lofað inngöngu af formanninum þegar ég kem heim, enda ekki verið við karlmann kennd síðan á síðustu ísöld (ef þið hafið ekki myndir getið þið ekki sannað annað ;o) )
Hlakka til félagsfundanna...

alltaf í boltanum

Ísland - Danmörk í kvöld. Danirnir hafa verið nett áhyggjufullir yfir þessum leik undanfarið og blöðin varað við að vanmeta "litlu eyjuna í norðri". Ekki séns að ég nenni að horfa á leikinn - en tékka kannski á honum annað veifið, aðallega svo ég geti farið út í sjónvarpsstofu og pirrað danina ef við skyldum nú komast yfir...

Segið svo að ég sinni ekki mínum þjóðernisskyldum!

Áfram Ísland

eins og vörtusvín í gaselluhópi

Lét mig hafa að mæta í bæinn á föstudagskvöldið og meira að segja skildi hauspokann eftir heima (gegn betri vitund)- var búin að mæla mér mót við Helle og fann hana með hópi af fólki sem ég kannaðist ekkert við, en hvað um það - bjórinn flaut í stríðum straumum og ég var allavega komin út úr húsi. Það var svo fyrst c.a. 1 tíma seinna sem einhver nýkomin einstaklingur spyr mig: "eruð þið öll í BP?" "BP?" spyr paddan í sakleysi sínu - "já - mér skillst að þetta sé BP hittingur hér". Og í gegnum ölþokuna rann upp fyrir mér ljós... Mér leið eins og gyðingi sem uppgötvar að hann er staddur á árshátíð Gestapó - BP stendur fyrir Beautiful People sem er danskur netklúbbur sem montar sig af að vera sá mest aðlaðandi á netinu. Maður fær ekki inngöngu nema að aðrir meðlimir mæli með þér og samþykki - með öðrum orðum æðsta musteri egóflipparans. Ef ég hefði ekki verið vandlega njörfuð niður á langborði dauðans hefði ég hlaupið veinandi út - en varð að láta nægja að drekkja sjokkinu í meiri bjór. Enda þynnka dauðans á laugardag. Og sunnudag. Er jafnvel ekki frá því að það votti enn fyrir smá...

pizzaface í partýfíling

Svei mér þá ef ég á ekki séns á félagslífi þessa helgina - og bara mánuður síðan síðast! Hvernig á maður að lifa af þessa iðandi hringekju sem skemmtanalífið mitt er?
Því miður eru tilefnin frekar neikvæð í 2 tilfellum - kveðjubjór á föstudagsbarnum á eftir því Cecilia er að flytja til Kaupmannahafnar og ég sé hana líklega ekki meir...
Og kveðjukvöldverður annað kvöld fyrir Kaspar sem er að flytja til Þýskalands - á eftir að sakna hans hrikalega þar sem hann hefur gengt hlutverki "stóra bróður" míns síðustu 2 ár (það ætti líklega að segja mér eitthvað að mikið yngri manneskju finnst þörf á að passa að ég fari mér ekki á voða - en ég er afskaplega góð í að hundsa svona "hint"). Og svo er ég boðin í stóra garðveislu í kvöld hjá einhverjum 3 gaurum sem ég hef aldrei hitt... Þetta er víst árlegur viðburður með fullt af fólki, og það væri kannski ágætt að druslast út úr húsi og hitta nýtt fólk og víkka sjóndeildarhringinn aðeins - enda ekki vanþörf á! Hins vegar hittist á að sjálfstraustið er ekki beinlínis í botni í dag - það býr feitur og bólugrafinn fílamaður í speglinum mínum þessa dagana og mér hefur ekki tekist að flæma hann burt. Svo planið hljómar svona: mæta á föstudagsbarinn á eftir og taka 2-3 bjóra með Cecilie og stelpunum, og sjá hvort blessaður bjórinn nær að drekkja kompleksunum og koma mér í djammfíling. Þá er aldrei að vita nema paddan litla skelli sér út í óvissuna og máli bæinn bleikan. En það kemur allt í ljós... Góða helgi elskurnar!